“Marvel” කොමික්ස්ලට Marvel Cinematic Universe එක තියෙනව වගේ DC ආයතනයට වෙන් වෙලා තියෙන ශෙයාඩ් යුනිවර්ස් එක වෙන්නේ DCEU, එහෙමත් නැත්තම් DC Extended Universe එක. MCU නම් අද වෙද්දී සිනමා ඉතිහාසය තුළ එතෙක් මෙතෙක් වැඩිම ආදායමක් ඉපයූ චිත්‍රපට මාලාව බවට පත්වෙලා තියෙද්දී, DCEU එක ලප් තැනම ෆ්ලොප් වෙලායි ඉන්නේ. 2013 Man Of Steel චිත්‍රපටයෙක් සුපිරිම ආරම්ඹයක් ගත්තත් DCEU එකට ඒ සාර්ථකත්වය දිගටම රැකගෙන යන්න නොහැකි වුණා. දක්ෂ රංගන ශිල්පීන්, අධ්‍යක්ෂකවරයින් එක්ක පටන් ගත්තු ඒ දැවැන්ත ගමන අවසන් වුණේ අන්තිමේදී ෆෑන්ස්ලව වගේම මේ නිර්මාණයන් වෙනුවෙන් දායක වුණු අයවත් ව්‍යාකූල තත්ත්වයට ඇද දමලයි. ඉතිං ආයෙ ගොඩ එන්න බැරි තරම් වැඩේ වැරදුණාම ගන්න තියෙන අනිත් පියවර මොකද්ද ආයෙ මුල ඉඳන් පටන් ගන්න එක ඇරුණම…?

ඉතිං ඉදිරි වසර කිහිපය තුළ DCEU එක “DC Universe” නමින් ආයෙත් අලුත්ම ආරම්භයක් අරගන්න සූදානම්. ඒ Guardians of the Galaxy චිත්‍රපට ත්‍රිත්වය වගේම DC ලගෙ The Suicide Squad (2021) සහ Peacemaker රූපවාහිනී කතා මාලාව නිර්මාණය කරපු ජේම්ස් ගන්ගේ සැලසුම් අනුව. හැබැයි මේ තීරණය ගන්න කලින් නිනිශ්පාදන මට්ටමේ තිබුණු චිත්‍රපට ටිකත් අතාරින්න නම් WBD ලාගේ සූදානම් නැහැ. ඒ නිසයි SHAZAM!: The Fury of the Gods, The Flash වගේම අද මේ අරන් එන Blue Beetle චිත්‍රපටයත් සාර්ථක වෙන්න හෝ අසාර්ථක වෙන්න කියලා සිනමාශාලාවලට නිකුත් වෙන්නේ.
බාදා ගණනාවක් මැද නිකුත් වුණු මේ චිත්‍රපටය ගැන කතා කරන්න බොහෝ දේවල් තිබෙනවා. ඒත් ඊට කලින් පුරුදු විදිහට දන්න නොදන්න හැමෝම වෙනුවෙන් චිත්‍රපටයේ ප්‍රධාන චරිතයේ ඉතිහාසය ගැන ටිකක් අවුස්සලාම ඉමු.

කවුද මේ “Blue Beetle” (බ්ලූ බීට්ල්) කියන්නේ?

බ්ලූ බීට්ල්ගේ කොමික් පසුබිම නම් ටිකක් දුරට සංකීර්ණ එකක් කිව්වට වරදක් නැහැ. මොකද කොමික් දිහා බලද්දී බ්ලූ බීට්ල් කියන්නේ එක චරිතයක් නෙවෙයි… චරිත තුනක්!

1939 අවුරුද්දේ අගෝස්තු මාසෙදී Fox Comics ආයතන විසිනුයි මුලින්ම බ්ලූ බීට්ල් චරිතය ලෝකයට හඳුන්වලා දෙන්නේ. ඔව්, මේ චරිතය මුලින්ම DC කොමික් පිටු අතරින් බලාගන්න ලැබුණු එකක් නෙවෙයි. 1939 වසරේ ඉඳන් විවිද කොමික් ආයතන අතින් බ්ලූ බීට්ල් චරිතය ප්‍රකාශයට පත් වෙනවා. ප්‍රධාන වශයෙන් Fox කොමික් ආයතනයෙන් Charlton කොමික් ආයතනයටත්, ඔවුන්ගෙන් AC ලා අතට ගිහින් DC නිවසටත් බ්ලූ බීට්ල්ගේ ප්‍රකාශන අයිතිය හිමි වෙනවා. මේ චරිතයේ අනන්‍යතාවය කාලෙන් කාලෙට වෙනස් වෙන්නත් මේ ප්‍රකාශන ආයතනවල වෙනස්වීම හේතු වුණා. ඒ නිසා අපි බ්ලූ බීට්ල්ව එක චරිතයක් විදිහට වඩා පරම්පරාවෙන් පරම්පරාවය බෙදිල යන “තනතුරක්” විදිහට හැඳුන්නුවොත් තමයි වඩා සුදුසු වෙන්නේ.

ඉතිං මේ වෙද්දී හිටපු ප්‍රධානම බ්ලූ බීට්ල්ලා තුන්දෙනෙක් ඉඳලා තියෙනවා. ඔවුන් තමයි,

Dan Garrett
Ted Kord
Jaime Reyes

ඩෑන් ගැරට්

(ඩෑන් ගැරට්)

කොමික් ඉතිහාසයේ “ගෝල්ඩන් ඒජ්” එක අතර තුර නිර්මාණය වුණු පළවෙනි බ්ලූ බීට්ල් වෙන්නේ ඩෑන් ගැරට්. මෙයා තමා “බ්ලූ බීට්ල්” නම මුලින්ම අරගත්තු සුපිරි වීරයා වෙන්නේ. ඩෑන් බ්ලූ බීට්ල් බවට පත් වුණු විදිහත් කාලෙන් කාලෙට වෙනස් වෙලා තියෙන බව කියන්නම ඕනේ. ඩෑන්ටත් ප්‍රධාන ඔරිජින් ස්ටෝරීස් දෙකක් තියෙනවා.

පළවෙනි ඔරිජින් ස්ටෝරි එකට අනුව නම් ඩෑන්ට Vitamin 2X කියන රසායනය නිසා සුපිරි බලයක් හිමි වෙලයි පොර සුපිරි වීරයෙක් බවට පත් වෙන්නේ.

මේ විටමින් 2X කතාවත් පස්සෙ කාලෙක චාල්ටන් කොමික්ස්ලා වෙනස් කරන්න තීරණය කරනවා. ගෝල්ඩන් ඒජ් එකේදි විටමින් 2X එකෙන් ඩෑන්ට සුපිරි බලයක් හිමි වුණාට සිල්වර් ඒජ් එකට එද්දී චාල්ටන්ලා “Scarab” එක හඳුන්වලා දීලා වෙනස්ම පැත්තකට බ්ලූ බීට්ල්ව අරගෙන යනවා. (ස්කැරබ් එක ගැන තව ටික්කින් මම කියන්නම්)

ටෙඩ් කෝඩ්

ඩෑන්ගෙන් පස්සේ බ්ලූ බීට්ල් මැන්ට්ල් එක පාස් වෙන්නේ ටෙඩ් කෝඩ් කියන මිලියනපති ව්‍යාපාරිකයා අතටයි. චාල්ටන් කොමික්ස්ලා බ්ලූ බීට්ල් චරිතය වෙනස්ම පැත්තකට අරන් යන්නේ ටෙඩ් කෝඩ් අතට බ්ලූ බීට්ල් තනතුර ලබාදීලයි.

ටෙඩ්ගේ කලින් හිටිය පළවෙනි බ්ලූ බීට්ල් වෙන ඩෑන් ගැරට්ව චාල්ටන් කොමික්වල පෙන්වන්නේ පුරාවිද්‍යාඥයෙක් විදිහට. ඊජිප්තුවේ කැණීම් කටයුත්තක් අතර තුර ස්කැරබ් කියන පිටසක්වළ උපකරණය හොයාගත්තට පස්සේ ඩෑන්ට සුපිරි බලයන් හිමි වෙනවා. ස්කැරබ් එකෙන් ලැබෙන බලයන්ගේ උදවුවෙන් කාලයක් පුරා අපරාධවලට එරෙහිව සටන් කරන ඩෑන්ට ජාවිස් කෝඩ් නම් සතුරෙක් එක්ක ගැටෙන්න සිද්ද වෙනවා. මේ ජාවිස් කෝඩ්ගේ බෑණා තමයි ටෙඩ් කෝඩ් කියන්නේ. ජාවිස්ගේ සැලැස්ම තමා රොබෝ හමුදාවක් හදලා ලෝකෙම පාලනය තමන්ගේ අතට අරගන්න එක. සිදුවීම් කිහිපයකට පස්සේ ටෙඩ් තමන්ගේ මාමාව පරද්දන්න ඩෑන්ට උදවු කරන්න තීරණය කරනවා. ජාවිස්ට නෑකමින් සම්බන්ධකම් කියද්දී ටෙඩ් ශිෂ්‍යයෙක් විදිහට ඩෑන්ව හඳුනගන්න නිසා මේ දෙන්නා අතර ලොකු විශ්වාසයක් ගොඩනැගෙනවා.

ජාවිස් එක්ක සටන ඩෑන් ජයගත්තත් අවසානාවන්ත විදිහට ඔහු එක්කම මිය යන්න ඩෑන්ට සිද්ද වෙනවා. ඉතිං ඩෑන් තමන්ගේ ශිෂ්‍යයා වගේම විශ්වසනීය සහයකයා වුණු ටෙඩ්ටයි තමන්ගෙ බ්ලූ බීට්ල් ලෙගසි එක පාස් කරන්නේ. ඒත් මෙතන ලොකු අවුලක් තිබුණා. ඩෑන්ට සුපිරි බලයන් ලබාදුන්නූ “ස්කැරබ්” එක ටෙඩ් එක්ක සම්බන්ඳ වෙන්නේ නැහැ. මේ හේතුව නිසා ටෙඩ්ට ඩෑන්ට ලැබුණා වගේ කිසිම සුපිරි බලයක් හිමි වෙන්නේ නැහැ. ඒත් ඒ දෙයින් සැලෙන්නෙ නැති ටෙඩ් දැවැන්ත “කෝර්ඩ් ඉන්ඩස්ට්‍රි” එකේ අයිතියත් අරගෙන තාක්ෂණය යොදාගෙන “බ්ලූ බීට්ල්” සුපිරි වීරයා බවට පත් වෙනවා. පොරට කිසිම සුපිරි බලයක් නැහැ, තනිකරම ටෙඩ් ගේම ගහන්නේ ගැජට්වලින් විතරයි.

(ටෙඩ් කෝඩ් දෙවෙනි බ්ලූ බීට්ල් ලෙසින්)

ටෙඩ්ගේ දෛවය සම්පූර්ණයෙන්ම වෙනස් වෙන්නේ ’80 ගණන්වල මැද භාගයේ DC ලා බ්ලූ බීට්ල් චරිතයේ සියලුම හිමිකම් තමන්ගේ අතට අරගත්තට පස්සෙයි. ටෙඩ්ට ලොකු වටිනාකමක් දෙන DC ලා ඔහුව ජස්ටිස් ලීග් සාමාජිකයෙක් කරනවා විතරක් නෙවෙයි, බූස්ටර් ගෝල්ඩ් කියන තවත් ප්‍රධාන චරිතයක් සමග ලොකු මිත්‍රත්වයක් ටෙඩ්ට ලබාදෙනවා. ඒ විතරක් නෙවෙයි, DC විශ්වයේ ඉන්න බුද්ධිමත්ම චරිතයක් විදිහටයි ටෙඩ් කෝඩ්ව හඳුන්වන්නේ.

Jaime Reyes

(ජේමි රෙයෙස් බ්ලූ බීට්ල් ලෙසින්)

වර්තමානයේ බ්ලූ බීට්ල් ලෙගසි එකට හිමිකම් කියන, මේ ෆිල්ම් එකෙත් ප්‍රධාන චරිතය වෙන තුන්වෙනි බ්ලූ බීට්ල් වෙන්නේ හයිමේ රෙයෙස්. හයිමේ කියන්නේ මෙක්සිකන්- ඇමරිකන් ජාතික සුපිරි වීරයෙක්. 2006 Infinite Crisis කොමික් එකෙන් පස්සේ අද වෙනකන් හැම කොමික්, ඇනිමේශන් සීරීස් එකකම වගේම ෆිල්ම් එකකත් බ්ලූ බීට්ල් ලෙගසි එකට හිමිකම් කියන්නේ හයිමේ විසින්.

හයිමේගේ බ්ලූ බීට්ල් ඔරිජින් එකට ප්‍රධාන කරගන්න පුලුවන් Infinite Crisis කොමික් සීරීස් එක. Infinite Crisis කොමික් එකේදි ලෝකය උඩු යටිකුරු කරන දැවැන්ත රහසිගත කුමන්ත්‍රණය හොයන්න ටෙඩ් කෝඩ් තමන්ගේ ජීවිතයම කැප කරනවා. සැලැස්මේ මහ මොළකරුව මුහුණට මුහුණ හමුවෙන්න කලින් ටෙඩ් විසින් ඩෑන්ගෙන් තමන්ට හිමිවුණු ස්කැරබ් එක ආරක්ෂිත අතකට ලබාදීලයි යන්නේ. මතකනේ මම උඩදි කිව්වා ස්කැරබ් එක ටෙඩ් එක්ක සම්බන්ඳ වෙන්න ප්‍රතික්ෂේප කරනව කියලා. ඉතිං ස්කැරබ් එකේ වැදගත්කම දන්න තව කෙනෙක් වෙන “SHAZAM” විසාඩ් අතට ටෙඩ් ස්කැරබ් එක ලබාදෙනවා. (ශසෑම් විසාඩ් කියන්නේ බිලී බැට්සන්ට ශසෑම් බලයන් ලබාදුන්නු මහලු මායාකාරයාට)

කොහොම හරි විසාඩ් ශසෑම්ටත් පහර දීමක් වෙන නිසා ස්කැරබ් එක ඔහු අතින් ගිලිහිලා යනවා. ඉතිං මේ ස්කැරබ් එක විසාඩ් ශඔසෑම්ගෙන් වෙන් වෙලා ගිහින් වැටෙන්නේ ඇමරිකාවේ ටෙක්සාස් ප්‍රාන්තයේ එල් පාසෝ කියන ප්‍රදේශයට. මේ එල් පාසෝවල ජීවත් වෙන හයිමේ රෙයෙස් කියන ගැටවර වයසේ කොල්ලෙක් අහම්බෙන් දැකලා ස්කැරබ් එක අහුල ගන්නවා. වාසනාවකට හෝ අවාසනාවකට ටෙඩ් එක්ක සම්බන්ඳ නොවුණු ස්කැරබ් එක හයිමේ එක්ක සම්බන්ඳ වෙලා තුන්වෙනි බ්ලූ බීට්ල්ව නිර්මාණය කරනවා. ඉතිං සරළ සාරාංශව කිව්වොත් මේක තමා වර්තමාන බ්ලූ බීට්ල්ගේ ඔරිජින් ස්ටෝරි එක.

ස්කැරබ් සහ බ්ලූ බීට්ල්

බ්ලූ බීට්ල් කියන්නේ නිකන්ම නිකන් සුපිරි බලයක් ලැබුණු පොඩි කොල්ලෙක් නෙවෙයි. මේ ෆිල්ම් එකේ ඉන්නේ DC විශ්වයේ ඉන්න බලවත්ම චරිතයක්. Young Justice ඇනිමේශන් සීරීස් එක එහෙම බලලා තියෙනව නම් මතක ඇතිනේ බ්ලූ බීට්ල් කොච්චර බලවත් වීරයෙක් වගේම භයානක සතුරෙක් වෙන්නත් පුලුවන්ද කියලා? පළවෙනි බ්ලූ බීට්ල් වෙන ඩෑන් ගැරට්ට වගේම වර්තමාන බ්ලූ බීට්ල් වෙන හයිමේටත් බලයන් ලැබෙන්නේ ස්කැරබ් එක නිසා. මේ දෙන්නටම බලයන් තිබිලා ටෙඩ් කෝඩ්ට විතරක් බලයන් නැති සාමාන්‍යය වීරයෙක් වෙන්නත් හේතුව ස්කැරබ් එකමයි.

ස්කැරබ් එකේ මූලාරම්භය කතා කරන්න නම් “Reach” (රීච්) ගැන කතා කරන්නම වෙනවා.

රීච් කියන්නේ DC පෘථිවියෙන් පිට විහිදුණු බලවත් පිටසක්වළ ශිෂ්ටාචාරයක්. රීච්ලාගේ අරමුණ වෙන්නේ තමන්ට පුලුවන් උපරිමයෙන්ම විශ්වය ආක්‍රමණය කරලා තමන්ගේ ශිෂ්ටාචාරය අනිත් ග්‍රහලෝකවලටත් පතුරන යන එක. විශ්වය ආක්‍රමණයට කරන්න නම් මෙයාලට කොච්චර බලවත් තාක්ෂණයක් ඇත්ද කියල හිතාගන්න පුලුවන්නේ. මෙයාලට ටෙලිපෝට් කරන තැනේ ඉඳන් ග්‍රහලෝක විනාශ කරන මට්ටමේ ආයුධ වගේම උපකරණත් තියෙනවා. රීච්ලා යුද්ධ කිරීම් අතින් “ග්‍රීන් ලැන්ටර්න් කෝප්ස්” එක සමග කරට කර ඉන්න බවත් කියන්නම ඕනේ.

සාමය මූලික කරගත්තු විශ්ව ආරක්ෂකයින් වෙන ග්‍රීන් ලැන්ටර්න්ලා සහ ලෝක ආක්‍රමණිකයන් වෙන යුධ ගැයුම් වුණු අවස්තා එමටයි. රීච්ලා සහ ග්‍රීන් ලැන්ටර්න්ලා අතර වුණු එක යුද්ධයක් අවසානයේ මේ දෙගොල්ලෝ එකඟතාවයකට එන්න තීරණය කරනවා. ඒ එකඟතාවයට අනුව රීච්ලාට ආයෙත් කිසිම යුද්ධයකින් කිසිම ලෝකයක් ආක්‍රමණය කරන්න නොහැකි තත්ත්වයට නීතියක් ලැන්ටර්න්ස්ලා අරන් එනවා. ලැන්ටර්න්වරුන් එක්ක ගැටිලා වෙන අවාසිය දැකපු රීච්ලා එක පියවරක් පස්සට තියල ඔවුන්ගේ නීතියට යටත් වෙන්න තීරණය කරන්නේ යටින් වෙනම සැලැස්මක් තියාගෙනයි.

මේ සිදුවීමෙන් පස්සෙයි “ස්කැරබ්” සංකල්පය රීච්ලා අතරට එන්නේ. ග්‍රීන් ලැන්ටර්න්ලගෙ වගේම ලෝකයක ජීවත් වෙන ජීවින්ගෙත් ඇස් වහලා කාටවත් නොදැනීම ආක්‍රමණය කරන්න රීච්ලා යොදාගෙන ප්‍රධානම රහස් ක්‍රමය වෙන්නේ ස්කැරබ්. තමන්ගේ අණසකට කීකරු ජීව ආයුධ නිර්මාණය කරන අරමුණ ඇතුවයි රීච්ලා ස්කැරබ් තාක්ෂණය හොයාගන්නේ. ස්කැරබ් එක සම්බන්ඳ වෙන ඕනම කෙනෙක්ගේ මනසේ වගේම ශරීරයේ සම්පූර්ණම පාලනය ගන්නත්, ඒ කෙනාව බලවත් යුධ “ආමර්” එකකින් ශක්තිමත් කරන්නත් ස්කැරබ් එකකට පුලුවන්. ඉතිං සුපිරි වීරයෙක් විදිහට හැඳින්නුවත් “බ්ලූ බීට්ල්” කියන්නෙත් රීච්ලා නිසා බලය ලැබුණු ජීව ආයුධයක්. බ්ලූ බීට්ල්ට බලයන් ලැබෙන්නේ “Khaji Da” නමින් හඳුන්වන එකම එක ස්කැරබ් එකක් නිසයි.

(ඛජී ඩා ස්කැරබ් එක)

ඉතිං ලෝක ගාණක් රහසේම ආක්‍රමණය කරමින් ගිය රීච්ලගේ අවදානය පෘථිවියටත් ලැබිල තියෙනවා. හැබැයි ඒ DC කොමික්වලත් ඊයේ පෙරේදා නෙවෙයි. පුරාවිද්‍යාඥයෙක් වුණු ඩෑන්ටත් Khaji Da ස්කැරබ් එක ලැබෙන්නේ Kha-Ef-Re කියන ඊජිප්තු රජුගේ සොහොනක තිබිලා. ඉතිං රීච්ලා පෘථිවිය ආක්‍රමණය කරන්න බලන් ඉන්නේ පුරාණ ඊජිප්තු ශිෂ්ටාචාරය පැවති කාලයේ ඉඳන් හෝ සමහර විට ඊටත් කලින්ම ඉඳන් කියලා මේකෙන් තහවුරු වෙනවා. ස්කැරබ් එක ගැන තවත් වැදගත් තොරතුරු ටිකක් කිව්වොත්,

• ස්කැරබ් එකත් බෙන් 10 යුනිවර්ස් එකේ ඔම්නිට්‍රික්ස් එක වගේ දාරකයෙක්ගේ ඇගේ සවිවුණොත් ආයෙ ගලවන්න නම් බැහැ.
• ස්කැරබ් එකක් හැම කෙනෙක්වම තමන්ගේ දාරකයා විදිහට තෝරගන්නෙත් නෑ.
• ස්කැරබ් එකකට ඊටම කියල බුද්ධියක් තියෙනවා. තමන්ව වගේම තමන්ගේ දාරකයාවත් අවශ්‍යය අවස්තාවල ආරක්ෂා කරගන්න ඒකට පුලුවන්.
• රීච්ලට ඕනම අවස්තාවකට ස්කැරබ් එකක් ඕවර්‍රයිට් කරලා ස්කැරබ් එක වගේම ඒකේ දාරකයාවත් තමන්ට කැමති විදිහට පාලනය කරන්නත් පුලුවන්.
• Khaji Da ස්කැරබ් එක හයිමේගේ කොඳු නාරටියට සම්බන්ඳ වෙනවා. මුල් කාලෙදි නම් හයිමේට ස්කැරබ් එකේ බලයන් පාලනය කරන්න අමාරු වෙනවා. ෆිල්ම් එකේ මුල් හරියෙත් පොර ස්කැරබ් එක නිසා අමාරුවෙ වැටෙන්නේ මේ නුහුරු ගතිය නිසයි. ඉතිං දාරකයෙක්ට ස්කැරබ් එකක සම්පූර්ණ පාලනය ගන්න ඕනෙ නම්, සෑහෙන කාලයක් ඒක අධ්‍යයනය කරන්න වෙනවා.
• ස්කැරබ් එක සාමාන්‍යයෙන් පොඩි කෘමියෙක්ගේ ස්වරූපයෙන් තිබුණත් මේකට විශාල ආමර් එකක් විදිහට විශාලනය වෙන්න හැකියාව තියෙනවා.
• ස්කැරබ් එකක් ක්‍රියාත්මක වෙන්නේ තමන්ගේ දාරකයා අනතුරක වැටුණු අවස්තාවක. තමන්ගේ දාරකයාට ඕන වුණත් නැතත් අනතුරක් දැනුණු ගමන්ම ඊට අවශ්‍යය ක්‍රියාමාර්ග අරගන්න ස්කැරබ් එක තීරණය කරනවා.
• එකම එක යුධ ඇඳුමකට විතරක් සීමා නොවී ශක්තීන් පාවිච්චි කරලා එක එක ආයුධ නිර්මාණය කරන්නත් ස්කැරබ් එකකට පුලුවන්.
• ස්කැරබ් එකකට පියාසර කිරීමේ හැකියාව තියෙනවා.
• ස්කැරබ් එකකට තමන්ගේ දාරකයාගේ භාෂාව අනුව සන්නිවේදනය කිරීමේ හැකියාවත් තියෙනවා.
• ස්කැරබ් එකක් නිර්මාණය වෙන්නේ යුධ ආයුධයක් විදිහටනේ. ඉතිං රීච්ලාගේ දියුණු තාක්ෂණය නිසා ස්කැරබ් එකකට අවශ්‍යය ඕනෑම තර්ජනයකට ගැලපෙන්න වෙනස් වෙන්නත් පුලුවන්. ඉතිං පෘථිවියෙන් එහා විශ්වයේ තාක්ෂණයට වගේම මැජික්වලටත් ඔරොත්තු දීමේ හැකියාව මේකට තියෙනවා.

දැන් ඔයාලට තේරෙනවා ඇතිනේ බ්ලූ බීට්ල් කෙනෙක්ගේ ප්‍රධානම අවිය වගේම බල මූලාශ්‍රය වෙන්නෙත් මේ ස්කැරබ් එක කියලා. කොහොම හරි ටෙඩ් කෝඩ්ට අනිත් දෙන්නා තරම් බලවත් බ්ලූ බීට්ල් කෙනෙක් වෙන්න බැරි වුණත් තමන්ගෙම තාක්ෂණය යොදාගෙන වෙනස්ම විදිහේ බ්ලූ බීට්ල් කෙනෙක් වෙන්න ඔහුට පුලුවන් වෙනවා. ටෙඩ් කෝඩ්ගේ බ්ලූ බීල්ට්ලුත් ටිකක් දුරට බැට්මෑන්ට සමාන වෙන්නේ මේ නිසයි.

බ්ලූ බීට්ල් චිත්‍රපටයට ආවොත්…

ප්‍රධාන බ්ලූ බීට්ල්ලාගෙන් තුන්වෙනියව ප්‍රධාන කරගෙනයි 2023 ලයිව් ඇක්ශන් බ්ලූ බීට්ල් චිත්‍රපටය නිශ්පාදණය වෙලා තියෙන්නෙ. මේ ෆිල්ම් එක මුලදි HBO Max වෙනුවෙන් ස්ට්‍රීමින් කරන්න විතරක් නිර්මාණය වුණත් Warner Bros. Discovery ලා මේක සිනමාශාලා වෙනුවෙන් නිකුත් කරන්න තීරණය කරනවා. ඒත් අන්තිමේට නිකුත් වුණු DCEU චිත්‍රපටවල දෛවයටම සමාන ඉරණමක්මයි බ්ලූ බීට්ල්ටත් ලැබුණේ. විචාරක පැසසුම් ටිකක් ධනාත්මක පැත්තට කැරකුණත් ආදායම් අතින් නම් සතුටු වෙන්න විදිහක් නැහැ. DCEU චිත්‍රපටයක් ලබාගත් අඩුම ආදායම ලැබුණු වාර්තා කරමින් ඩොලර් මිලියන 104 ක පිරිවැයකට එරෙහිව ඩොලර් මිලියන 120 ක ආදායමක් පමණයි චිත්‍රපටය උපයන්න සමත් වෙන්නේ. ඒත් ෆ්ලෑශ් තරන් මාකට් වෙන්නෙත් නැතුව අනිත් පැත්තට ස්ට්‍රීමින් විතරක් වැටෙන්න තිබුණු ෆිල්ම් එකක් විදිහට බජට් එක කවර් කරගත්තු එකත් ලොකු දෙයක් කියල කියන්න පුලුවන්. අනික ෆිල්ම් එක සිනමාශාලාවලට නිකුත් වුණෙත් බාධාවන් ගොඩක් මැද්දෙයි.

බ්ලූ බීට්ල් චිත්‍රපටය අයිති වෙන්නේ පරණ DCEU එකටද නැත්නම් ජේම්ස් ගන් පටන් ගත්තු අලුත් DCU එකටද කියලා තාමත් පැහැදිලි තහවුරු කිරීමක් නැහැ. චිත්‍රපටයේ අධ්‍යක්ෂකවරයාට අනුව මේක අලුත් DCU එකේ කොටසක් වුණත් ජේම්ස් ගන් සහ පීටර් සෆ්‍රාන් තාමත් මේ කාරණාව ගැන ව්‍යාකූල වෙලා ඉන්න බවයි පෙනෙන්න තියෙන්නේ. ළඟදි තිබුණු ඉන්ටර්වීව් එකකදී බ්ලූ බීට්ල් චිත්‍රපටය අලුත් විශ්වයේ කොටසක් නොවෙන බව ජේම්ස් ගන් කියලත් තිබුණා.

චිත්‍රපටයේ ප්‍රවර්ධන කටයුතු සිද්ද වුණෙත් SAG-AFTRA දැවැන්ත හොලිවුඩ් වැඩ වර්ජනය වෙන කාලෙදි. ස්ට්‍රයික් එක නිසා මාකටින් වැඩවලට චිත්‍රපටයේ ප්‍රධාන රංගන ශිල්පීන් පවා සහභාගී වීම.ප්‍රතික්ෂේප කරා. බැරිම තැන DC රසිකයින් එකතු වෙලා චිත්‍රපටයේ ප්‍රවර්ධන කටයුතු ආරම්ඹ කරන්න පවා පෙළඹුනා.

කොහොම හරි ප්‍රශ්න ගොඩක් මැද නිර්මාණය වෙලා ප්‍රශ්න ගොඩක් ඉතුරු කරපු මේ අපූරු චිත්‍රපටය මෑත කාලයේ බිහිවුණු ටිකක් හොඳ සෝලෝ කොමික් චිත්‍රපටයක් කියල බොහෝ දෙනා එකඟ වෙනවා. ලයිව් ඇක්ශන් තිරයෙන් වැඩිය කතා බහ නොවුණු බ්ලූ බීට්ල්ගේ ඉතිහාසය වගේම හයිමේ රෙයෙස්ගේ චරිතයත් හොඳට ඉස්මතු කරන්න මේ ෆිල්ම් එක නම් සමත් වෙලා තියේ. අන්තිමේට රිලීස් වුණු ෆ්ලෑශ් චිත්‍රපටයට වඩා CGI වලින්, එන්ඩින් එකෙන් එහෙම බ්ලූ බීට්ල් සෑහෙන ඉස්සරහින් ඉන්නවා කියලයි මට නම් හිතෙන්නේ.

චිත්‍රපටයේ ප්‍රධාන කාස්ට් එකෙනුත් අපිට හුරු පුරුදු මුහුණු කිහිපයක් බලාගන්න පුලුවනි. හයිමේ රෙයෙස් aka. Blue Beetle චරිතයට පන පොවන්නෙ Cobra Kai සීරීස් එකේ අපේ මිගෙල්ට රංගනය ලබාදුන්නු Xolo Mariduena විසින්. Xolo නම් බ්ලූ බීට්ල් චරිතයට හොඳ සාධාරණයක් ඉශ්ට කරනවා. සමහර විට අලුත් විශ්වයෙත් හයිමේ විදිහට පොරව දිගටම බලාගන්න ලැබෙයි. ඔහු එක්ක Bruna Marquezine, Adriana Barraza, Damian Alcazar, Susan Sarandon, George Lopez සහය රංගනය ලබාදෙනවා. චිත්‍රපටය අධ්‍යක්ෂණය වෙන්නේ Angel Manuel Soto අතින්. IMDB දර්ශකයේ 6.6 ක් වගෙම කුණු තක්කාලි මීටරෙත් 78% කට කරකන්න මේ ෆිල්ම් එකට පුලුවන් වෙලා තියේ.

කොහොම හරි මේ වසරේ නිකුත් වෙන අවසන් DC චිත්‍රපටය මේකම නෙවෙයි. Aquaman: The Lost Kingdom චිත්‍රපටයෙනුයි 2023 DC ලයින් අප් එක අවසන් වෙන්න නියමිත වෙලා තියෙන්නේ.

එහෙනම් ඉතිං බ්ලූ බීට්ල් ගැන ලොකු විස්තරයෙන් පස්සේ ඉතුරු හරිය ඔයාලට ඉතුරු කරලා සමුගන්නයි මේ සූදානම් වෙන්නේ. එහෙනම් ආයෙත් හමුවෙන බලාපොරොත්තුව ඇතුව දැනට සමුගන්නවා.

“The universe has sent you a gift, and you have to figure out what to do with it.”

(“විශ්වය ඔයා වෙනුවෙන් තෑග්ගක් එවලා තියෙන්නේ, ඒ දේ කොහොමද පාවිච්චි කරන්නේ කියලා හොයාගන්න එක ඔයාට භාරයි.”)

පුරාතන ලෝකයේ පිරමීඩ හදන කාලේ ඉඳලා අද වෙනකම් තවමත් එක්තරා නොසංසිඳුණු ආශාවක් මිනිස් හිතේ තියෙනවා. ඒ තමයි, අහස සිඹින ගොඩනැගිල්ලක් ඉදිකරන එක. මෙච්චර කාලයක් තිස්සේ හීනයක් විදියට තිබ්බ මේ ආශාව, එක්තරා විදියකින් සම්පූර්ණ වුණා කියලා කියන්න පුළුවන්.

ලෝකේ උසම ගොඩනැගිල්ල මොකක්ද? බර්ජ් කලීෆා ගොඩනැගිල්ලද? නැහැ. හොං-කොං හි පර්ල් කුළුණ! එම්පයර් ස්ටේට් කුළුණ අඩි 1250ක් උසයි. බර්ජ් කලීෆා කුළුණ අඩි 2717 ක් උසයි. දැන් මේ කියන්න යන පර්ල් කුළුණ අඩි 3500ක් උසයි. එම්පයර් ස්ටේට් කුළුණ වගේ තුන්ගුණකට පොඩ්ඩයි උසින් අඩු වෙන්නේ.

හොං-කොං හි පිහිටා තිබෙන ලොව උසම ගොඩනැගිල්ල වන මෙහි භාවිතා කෙරෙන්නෙ අති නවීනම තාක්ෂණය. විශේෂයෙන්ම, ගිණි නිවීම සඳහා මේ පර්ල් ගොඩනැගිල්ලේ භාවිතයට ගැනෙන්නේ, මේ ගොඩනැගිල්ලටම ආවේණික ආකාරයේ ස්වයං මුද්‍රා තැබෙන වාතාශ්‍ර පද්ධතියක්. ඒ වගේම, ශක්තිමත් ජල විදිනය වගේම, කාබන්ඩයොක්සයිට් දහරාව නිසා, බොහොම පොඩි වෙලාවකින් ඕනෑම ආකාරයේ ප්‍රබල ගින්නක් නිවලා දාන්න පුළුවන්කම තියෙනවා. ගොඩනැගිල්ලේ මේ හැමදෙයක්ම නිරීක්ෂණය කෙරෙන්නෙ හැතැප්මක් ඈතට වෙන්න පාලන පහසුකම් තියෙන තැනක ඉඳන්. තට්ටු 220කින් සමන්විත වෙන, ලොව හොඳම ආරක්ෂක ව්‍යුහය සහිත, ලොව උසම ස්ථානය තමයි මේ හොං-කොං හි පිහිටා තිබෙන පර්ල් කුළුණ. ඒත්, ඇත්තටම පර්ල් එක කියන්නේ වෙනම දෙයක්. කුළුණ මුදුනටම වෙන්න තියෙනවා අදහාගන්න බැරි ආකාරයේ ගෝලයක්. මේ ගෝලය සමන්විත වෙන්නේ චලන සංවේදී ප්‍රක්ෂේපණ පැනල් 317 කින්. ඒ වගේම, මේ ගෝලය සමන්විත වෙනවා, 8K මයික්‍රෝ කැමරා දෙපැත්තටම හයි කරපු, අල්ට්‍රා හයි ඩෙෆිනිෂන් පැනල් විසිපන්දාහකින් විතර. මේ හේතුව නිසාම මේ පර්ල් කුළුණ ලෝකේ අටවෙනි පුදුමය බවට පත්වෙනවා.

විල් සෝයර්! ඇමරිකානු මැරීන් බලකායේ රාජකාරි නියතු සෙබලෙක්. අවුරුදු හයක් පුරාවට ඇමරිකානු FBI ආයතනයේ රාජකාරි නියතු නියෝජිතයෙක්. අවුරුදු අටක් පුරාවට ප්‍රාණ ඇපකරුවන් මුදවා ගැනීමේ කණ්ඩායමක සේවයේ නියතු සෙබලෙක්. හැබැයි, ඒ බොහොම කාලයකට ඉස්සර. අවසාන ප්‍රාණ ඇපකරුවන් මුදවා ගැනීමේ මෙහෙයුම නිමාවට පත්වුණේ මේ වීරෝදාර සෙබලාට සිය ජීවිත කාලයටම අමතක නොවන අන්දමේ මතකයන් රැසක් හිමිකර දෙමින්. බොහොම දරුණු විදියට තුවාල වෙච්ච මේ සෙබලා, අවසානයේ සිය ජීවිතය බේරගන්න සමත් වුණා. නමුත්, ඔහුගේ කකුලක් නම් ඉවත් කරන්න සිද්ධවුණා. මේ තමයි විල් සෝයර්ගේ හමුදා ජීවිතයේ අවසානය. අවුරුදු ගණනාවක් ගතවුණා. දැන් ඔහු දරුවන් දෙදෙනක් ඉන්න ආදරණීය පියෙක්. බොහොම සෙනෙහෙබර ස්වාමියෙක්. හමුදාවෙන් විශ්‍රාම ගත්ත දවසේ ඉඳලා තුවක්කුවක් අතින් වත් අල්ලලා නැහැ. නමුත්, සමහර දේවල් වලින් අපි කොච්චර ඈත් වෙලා ඉන්න හැදුවත්, ඒ දේවල් කොහොමහරි අපිව හොයාගෙන එනවා.

ඔබගේ පවුල ඔබට කොච්චර වටිනවද?
ඔබගේ පවුල වෙනුවෙන් ඔබ ඕනෙම දෙයක් කරනවද?
ඔබගේ පවුල වෙනුවෙන් ඔබට ඔබගේ ජීවිතය අවදානමේ දාගන්න වුනොත් ඔබ මොකද කරන්නේ?

සැකයක් නැහැ, ඔබගේ පවුල වෙනුවෙන් ඔබ ඕනෙම දෙයක් කරාවි. මොකද, ඔබගේ පවුල තමයි මේ ලෝකේ ඔබට තියෙන වටිනාම දේ. මොන දේ කැපකරලා හරි, ඒ දේ බේරගන්න තමයි මේ ලෝකේ ඕනෙම කෙනෙක් උත්සාහ කරන්නේ. ඒක තමයි ලෝක ධර්මතාවය. මේ ධර්මතාවට මිනිස්-සත්ව දෙගොල්ලොන්ටම පොදු ධර්මතාවයක්. ඒක මේ විල් සෝයර් නම් කකුලක් අහිමි වෙච්ච, වීරෝධාර සෙබළටත් පොදු ධර්මතාවයක්!

නවීන තාක්ෂනය එක්තැන් කරලා නිෂ්පාදනය කරපු අහස සිඹින පර්ල් කුළුනේ ආරක්ෂක උපදේශක තනතුර සඳහා මේ විශ්‍රාමික සෙබළ විල් සෝයර්ව බඳවා ගන්නවා. නමුත්, රැකියාව ලැබිලා පැය කීපයක් යන්න කලින් හැමදෙයක්ම කණපිට ගැහෙනවා. කිසිම විදියකින් ගිණි තියන්න බැහැ කියපු මේ විශ්වකර්ම නිර්මාණය බුර බුරා නැගෙන ගිණි ජාලාවක් බවට පත්වෙනවා. හයක් හතරක් නොතේරෙන දරු දෙන්නත් එක්ක, විල් සෝයර්ගේ බිරිඳ මේ ගිණි ජාලාවට මැදි වෙනවා. කොහොමද එක සැරේටම මෙහෙම වෙන්නේ? කිසිම විදියකින් ගිණි තියන්න බැහැ කියපු ලෝකේ අටවෙනි පුදුමය හිටි හැටියෙම මෙහෙම ගිණි ගන්නේ කොහොමද? කිසිම හේතුවක් නැතුවද? නැහැ, ලොව ප්‍රමුඛ පෙළේ අතිශය දරුණු අපරාධකරුවෙකු විසින් මෙහෙයවන්නා වූ කල්ලියක් මේ ගොඩනැගිල්ලට ඇතුල් වෙනවා. බොහොම සූක්ෂම විදියට සැලසුම් කරලා සිද්ධකරපු මේ ප්‍රහාරයෙන් අති විශාල ව්‍යසනයක් වෙන්නයි යන්නේ. ආබාධිත තාත්තා කෙනෙක් විදියට විල් සෝයර් මේ සියල්ල දිහා අසරණව බලාගෙන ඉන්නද? තමන්ගේ පවුල තම ඇස් පනාපිටම ගින්නෙන් පිච්චිලා යනවා බලාගෙන ඉන්න පුළුවන් මොන තාත්තා කෙනෙක්ටද?

Dwayne Johnson, එහෙමත් නැත්නම් කවුරුත් දන්න විදියට “රොක්” ප්‍රධාන රංගන දායකත්වය සපයන නවතම සිනමා සිත්තම තමයි ඔබ වෙතට මේ ආකාරයෙන් අරගෙන එන්නේ. 2018 වර්ෂය වෙනුවෙන් “රොක්” රංගනයෙන් දායක වන අවසාන චිත්‍රපටය බවට බොහෝදුරට මෙය පත්වේවි. Action, Adventure, Thriller යන කාණ්ඩ නියෝජනය කරමින්, ජූලි 13 වෙනිදා තමයි මේ චිත්‍රපටය නිළ වශයෙන් මහජන ප්‍රදර්ශනය සඳහා නිකුත් වෙන්නේ. ඇමරිකානු ඩොලර් මිලියන 125කට අධික දැවැන්ත පිරිවැයක් දරමින්, මේ වසරේ වැඩිම වියදමක් දරමින් නිෂ්පාදනය කරන ලද චිත්‍රපට ලැයිස්තුවට එකතු වෙන්නට මේ චිත්‍රපටයට හැකියාව ලැබෙනවා. මේ සටහන ලියවෙන මොහොත වනවිට, Imdb දර්ශකයේ 6.1 ක මනාප අගයක්ද, Rotten Tomatoes හි 48% ක මනාප ප්‍රතිශතයක් හිමිකර ගැනීමටද සමත්කම් දක්වමින්, ඇමරිකානු ඩොලර් මිලියන 280 ක බොක්ස් ඔෆිස් ආදායම් වාර්තාවක් තමන් සන්තක කරගනිමින්, තවමත් සාර්ථක අයුරින් සිනමා ශාලා තුල තිරගත වෙමින් පවතිනවා. Dodgeball: A True Underdog Story (2004), We’re the Millers (2013), Central Intelligence (2016) වගේ චිත්‍රපට අධ්‍යක්ෂණය කරපු Rawson Marshall Thurber තමයි මේ චිත්‍රපටය අධ්‍යක්ෂණය කරන්නේ. විශේෂත්වයක් තියෙනවා, Comedy කැටගරියෙන් ඈත්වෙලා ප්‍රථම වතාවට තමයි Rawson Marshall Thurber මේ වගේ තනිකරම ක්‍රියාදාම චිත්‍රපටයක් අධ්‍යක්ෂණය කරන්නේ. මෙච්චර කාලයක් තිස්සේ කොමඩි චිත්‍රපට අධ්‍යක්ෂණය කර කර ඉඳපු මනුස්සයට මේ චිත්‍රපටයත් එක්ක ක්‍රියාදාම චිත්‍රපට හිතට අල්ලලා ගිහිල්ලද මන්දා, ඔන්න Wonder Woman චිත්‍රපටය තුලින් අතිශය ජනාදරයට පත්වෙච්ච Gal Gadot එක්ක “රොක්” ප්‍රධාන රංගන දායකත්වය ලබාදෙන Red Notice නම් ක්‍රියාදාම චිත්‍රපටයක් අධ්‍යක්ෂණය කරන්නත් Rawson Marshall Thurber මේ දවස් වල ලහි ලහියේ ලෑස්ති වෙනවලු ?

මේ සිනමා නිර්මාණය ගැන කතා කරනවා නම්, තිරගත වෙන්න පෙරාතුව පළමු පූර්ව ප්‍රචාරක පටය අන්තර්ජාලයට නිකුත් කිරීමත් සමගම ඇතිවෙච්ච කැළඹීම නම් සුළු පටු නැහැ. මොකද, චිත්‍රපටයේ එක දර්ශනයක් තියෙනවා, “රොක්” පාලමක් දිගේ දුවගෙන ඇවිත් බොහොම ඈතින් තියෙන වෙනත් ගොඩනැගිල්ලකට පනිනවා. මෙන්න මේ පනින පිම්ම නිසා තමයි මේ චිත්‍රපටය ගොඩක් දෙනා අතර කතා බහට ලක්වුණේ. පහතින් ඔබට එම දර්ශනයේ ජායාරූපයක් බලාගන්න පුළුවන්.

මේ සිද්ධිය නිසා කොච්චර උණුසුම්කාරී වාතාවරණයක් ඇති වුනාද කියනවා නම්, ගණිතමය වශයෙන් මේ පිම්ම සිදුකරන්න බැහැ කියලා ඔප්පු කරන්න පවා සිනමාලෝලීන් උනන්දු වුණා. ඔවුන් පවසන විදියට “රොක්” මෙහිදී අනිත් ගොඩනැගිල්ලට පනින කෝණය අනුව ඔහුට කිසිසේත්ම අනිත් ගොඩනැගිල්ලේ තියෙන විවරයට පැනගන්න නොහැකි වෙනවා වගේම, මේ පිම්ම සිදුකරන්න නම්, පැයට සැතපුම් 28.4ක වේගයක් සහිතව පාලම මතින් දුවගෙන පැමිණ, අදාළ පිම්ම පැනීමට සිදුවෙනවා. නමුත්, ලොව වේගවත්ම මිනිසා ලෙස අභිෂේක ලබා සිටින උසේන් බෝල්ට්ගේ පවා උපරිම වේගය ලෙස සැලකෙන්නේ පැයට සැතපුම් 27.4 ක වේගයක්. මේ නිසාම මේ පිම්ම, “සියවසේ ප්‍රෝඩාකාරීම/අතාත්විකම සිනමා දර්ශනය” විදියට පවා හඳුන්වා දෙන්න සිනමාලෝලීන් සහ විචාරකයින් අමතක කලේ නැහැ.

හැබැයි, විචාරකයෝ මොනවා කිව්වත්, චිත්‍රපටය බැලුවොත් ඔබටම තේරේවි, කොච්චර අතාත්වික වුනත් මේ පුදුමාකාර පිම්මත් එක්ක චිත්‍රපටයට කොච්චර නම් ආලෝකයක් එකතු වෙනවද කියලා. සිනමා ශාලාවක පුළුල් තිරයකින් මේ දර්ශනය නැරඹුවා නම් මං මේ කියන කාරණාව තව දුරටත් හොඳින්ම ඔබට තේරුම් යනවා ඇති. අතාත්වික දර්ශනයක් වුනත්, ඒකෙන් ප්‍රේක්ෂකයා පිනවන්න පුළුවන් නම්, ප්‍රේක්ෂකයා හට වින්දනයක් ලබාදෙන්න පුළුවන් නම්, ඒකෙ ඇති වරදක් නැහැ කියලයි මගේ නම් පෞද්ගලික මතය.

එහෙනම්, ඔබ “රොක්” ගේ සිනමා රසිකයෙක් නම්, ක්‍රියාදාම චිත්‍රපට නැරඹීමට ප්‍රිය කරන්නෙක් නම්, ඇඩ්වෙන්චර් චිත්‍රපට නැරඹීමට ප්‍රිය කරන්නෙක් නම්, ඔබ සොයන්නේ කම්මැලි කමක් නැතුව එක හුස්මට බලන්න පුළුවන් චිත්‍රපටයක් නම්, දෙසැරයක් හිතන්නේ නැතුව අරගෙන බලන්නයි තියෙන්නේ. ලොව උසම ගොඩනැගිල්ල මත තම ජීවිතය පරදුවට තබමින් ආදරණීය පියෙකු විසින් සිදුකරන්නා වූ අතිශය භයංකාර, පුදුමාකාර, වික්‍රමාන්විත මෙහෙයුම ඔබව මොහොතකට පියවි ලෝකයෙන් ඈත්කර තබාවි. ඩොලර් මිලියන 125කට අධික මුදලක් වියපැහැදම් කරලා නිෂ්පාදනය කරපු මේ චිත්‍රපටය පුරාවටම තාක්ෂනය බොහොම ඉහලින් පාවිච්චි කරලා තියෙනවා. මගේ පෞද්ගලික අදහස නම්, රොක් රංගනයෙන් දායක වන ඇක්ෂන්, ඇඩ්වෙන්චර් චිත්‍රපට අතුරින්, මේ චිත්‍රපටය ඉහළම ස්ථානයක තියන්න පුළුවන් බය නැතුව. වගකීමෙන් කියනවා, හෝරා එක හමාරක් ගෙවිලා යනවා ඔබට දැනෙන එකක් වත් නැහැ. ඔබගේ ඇස් දෙක ලොකු කරවලා, ඔබව පුටුව උඩ ඉන්දවන්න තරම් ඇඟ හිරිවට්ටන ඇඩ්වෙන්චර් දර්ශන කීපයක්ම චිත්‍රපටයේදී ඔබට බලාගන්න හැකියාව ලැබේවි. මේ වර්ගයේ චිත්‍රපට නරඹන්නන් මගනොහැර ගත යුතුම චිත්‍රපටයක් විදියට ඉහලින්ම නිර්දේශ කරනවා.

ජය වේවා!!

ලිපිය උපුටා ගැනීම :- Baiscope.lk හි පලවූ සිසිල ප්‍රසාද්  සහෝදරයාගේ ලිපිය

උපසිරසි හදල දෙන වෙබ්සයිට් එකෙන් හැමවෙලේම උපසිරසි ඩවුන්ලෝඩ් කරගන්න බලන්න ඒ වගේම උපසිරසි හදන අයව කමෙන්ට් කරල දිරිමත් කරන්න. ඒක මේ වෙබ්සයිට් එකේ විතරක් නෙමෙයි ඕනෙම එකක කරන්න . මොකද එයාල කාලය මහන්සිය කැපකරල ලොකු සේවයක් කරන්නෙ
Original ලිපිය හා උපසිරසිය පමණක් ලබාගැනීමට පහත සිංහල උපසිරසි Link එකෙන් පිවිසෙන්න